Empanadillas asadas de carne

 A masa destas empanadillas e moi sinxela de facer e boa de traballar. Ó facelas no forno  non levan tanta graxa coma na tixola e quedan máis lixeiras. Paga a pena probalas!
Imos primeiro coa masa das empanadillas:

Ingredientes:

• 375 gr de fariña de trigo
• 170 gr de manteiga fría cortada en cachos pequenos
• 75 ml de auga
• 1 ovo grande
• sal

Preparación:

Mesturar todos os ingredientes ate conseguir unha masa homoxénea.

Formamos unha bola, e deixámola na neveira 30 minutos.

Estiramos a masa e facemos discos con un cortador redondo. Para facelo imos collendo cachiños de masa, facemos unha boliña, poñémola entre dous trozos de papel de forno (eu corto cadrados nas que os vou deixando para que queden separadas) así xa non temos que engadirlle máis fariña á masa, cortamos e repetimos ate acabar coa masa. Gardamos os discos na neveira ate que teñamos o recheo listo.

Agora faremos o recheo, nesta ocasión serán de carne:

Ingredientes:

• 300 gr de carne de terneira picada*
• 1/2 cebola pequeña picada en cachos pequenos
• 4 culleradas de tomate natural triturado
• un chourizo pequeno (se son grandes con 1/2 pode ir ben)
• sal e pementa moída
• aceite de oliva

*como consello: mellor que merquedes a carne e a piquedes vós na casa, así saberedes xusto a calidade da carne que ides utilizar, ademais algunhas marcas venden coma carne picada preparados que levan outros ingredientes (aditivos, condimentos…) que poden non ir ben coa receita.

Preparación:

Quentamos o aceite nunha tixola, engadimos a cebola, antes de que se doure engadimos o tomate triturado e remexemos un par de minutos, engadimos a carne picada a sal e a pementa, movemos ate que cambie de cor (non hai que cociñala moito, acaba de cociñarse dentro da masa xa no forno) e sacámolo do lume.
Aparte cortamos o chourizo en dados pequenos, frixímolo e sacámolo a un prato cuberto con papel de cociña para que solte o exceso de graxa.
Xuntamos o chourizo co resto do recheo e xa está listo para encher as empanadillas.
Mentres enchemos as empanadillas aproveitamos para poñer a quentar o forno a 200º. Collede un vaso cun pouco de auga para axudar a pechar os bordes.

Poñemos unha cullerada do recheo no disco de masa, mollamos o dedo na auga e pasámolo polo borde, dobramos a masa e pechamos axudándonos cun garfo.

Pinchamos co garfo na parte de arriba (para que saia o vapor en non rebenten ó cociñarse) e imos colocando nunha bandexa forrada con papel de forno. Batemos un ovo e pintamos as empanadillas por riba e xa podemos levalas ó forno.

En uns 18-20 minutos estarán prontas (ide mirando a partir dos 18 minutos ate que teñan o punto de dourado do que gustedes)

Bo proveito!

Pan de plátano (Banana Bread)

Fixen o primeiro pan de plátano un día no que tiña uns plátanos maduros de mais e decidín probar a facer algo con eles. A receita adapteina dunha do libro da pastelería Hummingbird.
Unha vez fixen o primeiro acabouse en nada, e a partires de aí unha vez ó mes fago un. Aí vai:

Ingredientes:

• 200 gramos de plátano machucado cun garfo (canto máis maduros están os plátanos máis doces vai quedar o pan)
• 280 gramos de fariña de repostería
• 200 gramos de sucre de caña escuro integral
• 140 gramos de manteiga derretida* (no microondas ou nun cazo)
• 2 ovos
• 1 culleriña de xenxibre moído
• 1 culleriña de canela moída
• 1 culleriña de bicarbonato
• 1 culleriña de fermento en po

* Podedes substituíla por aceite de oliva ou xirasol.

Preparación:

- Poñemos o forno a quentar a 170º
- Xuntamos o azucre e os ovos e batemos ben ate que vexamos que está ben mesturado e se derreteu o azucre.
- Engadimos o plátano machucado e seguemos batendo.

- Engadimos os ingredientes en po (fariña, xenxibre, canela, bicarbonato e fermento), batemos un pouco e engadimos a manteiga derretida. Mesturamos ben.



- Untamos un molde con manteiga, despois poñemos fariña, dámoslle un par de golpiños para quitar o sobrante e vertemos a masa nel.

- Deixamos no forno 1 hora, comprobamos cun palillo ou con un coitelo que está feito (cravamos no centro do pan e ten que saír seco). Sacamos, deixamos cinco minutos e xa podemos sacalo do molde e deixalo arrefecer nunha grella.

Linguas de gato

Hoxe volvo con outro clásico. Caseiras ou non, seguro que probastes algunha vez as linguas de gato. Cando fagades esta receita non volveredes a querer das mercadas! Probade, probade!

Ingredientes:

• 2 claras de ovo
• 50 gramos de manteiga (a temperatura ambiente)
• 70 gramos de fariña peneirada
• 60 gramos de azucre en po peneirada
• unhas gotas de esencia de vainilla (opcional)

Preparación:

- Poñemos o forno a quentar a 200º.
- Mesturamos ben o azucre e a manteiga (a man e a modo, para non encher a cociña toda de azucre)

- Engadimos as claras e mesturamos sen bater moito, ate que queden integradas (se queredes usar a esencia de vainilla engadídela tamén neste paso)

- Poñemos a fariña pouco a pouco. Pasamos a masa a unha manga (se non tedes manga podedes usar unha bolsa das que se usan para conxelar e gardar alimentos). Pechamos con unha pinza pola parte de arriba e cortamos un pouco a punta pola que sairá a masa.

- Forramos un par de bandexas de forno con papel vexetal e poñemos tiras de masa de uns 5 cm de largo, hai que separar ben unhas de outras porque expanden moito.


- Metemos no forno 5 minutos (ou cando vexamos que teñen os bordes dourados) e sacamos.

- Deixámolas arrefriar nunha grella e despois pasámolas a unha lata ou recipiente hermético, aguantan ben unha semana (se duran ate ese punto, na miña casa desaparecen en nada)

Madalenas de nata

Cando era pequena recordo de sempre na casa da miña avoa, unhas madalenas (da tenda) que levaban o papel en cor preta e que eran das que máis gostabamos todos os curmáns, despois non sei se as deixaron de fabricar ou que pasou, o caso é que lles perdemos a pista. Despois de moitos anos e de probar moitas receitas de madalenas, atopei esta e podo dicir que saben igual. Son propias para o almorzo, van de marabilla co leite con cacao ❤

Ingredientes:

• 350 gr de fariña de trigo
• 250 gr de azucre
• 250 gr de aceite de oliva
• 100 gr de nata (tona)
• 1 sobre de fermento en po (16 gr)
• 4 ovos
• A pel de un limón relada

Preparación:

- Batemos os ovos xunto co azucre ata que aumenten o volume.
- Engadimos a nata e batemos outro pouco ata que integre.
- Engadimos a pel relada de limón e o aceite, bater.
- Pouco a pouco imos engadindo a fariña xunto co fermento.

º

- Imos preaquecendo o forno a 200º (calor arriba e abaixo) mentres preparamos os moldes.
- Colocamos os papeliños de madalena no molde (se non tedes molde podedes poñer os papeliños en  moldes de flan).
- Poñemos un pouco de masa en cada papeliño (acordádevos do truco da culler de xeado que vos expliquei nas madalenas de iogur) e metemos no forno 20 minutos. Eu non o poño, pero se vos gustan ca capiña de azucre que levan as veces por riba, o momento de poñerllo é xusto antes de metelas no forno.

Estas madalenas consérvanse ben uns días, se as gardades nunha caixa de lata e mesmo nunha bolsa das tipo "zip". 

Galletas con lacasitos

Imos a outra receita sinxela que non precisa de cousas moi especiais e con ingredientes que case sempre hai por casa. Estas galletas son as preferidas da miña meniña, ademais de que din ben bonitas e están ricas, mamá déixalle axudar a facelas! Imos aló!

Ingredientes:

• 300 gr de fariña
• 175 gr de manteiga 
• 100 gr de azucre branco
• 100 gr de azucre moreno
• 1 ovo e 1 xema
• 1 culleriña de esencia de vainilla
• 1 culleriña de bicarbonato 
• 1 chisco de sal
• Lacasitos ou M&M ou Smarties

 Preparación:
- Mesturamos ben os azucres branco e moreno coa manteiga e a esencia de vainilla.

- Engadimos o ovo e a xema e batemos ben.

- Engadimos a fariña pouco a pouco ate que quede unha masa que se poida traballar coas mans

- Poñemos papel de forno nunha bandexa e imos colocando boliñas de masa, que queden separadas para que ó crecer non se nos peguen unhas ás outras.
- Decoramos cos lacasitos con coidado de poñelos xuntos (a masa estira moito) e non apertalos moito. Este paso fíxoo a miña pinche favorita 💖 como podedes ver.

- Meter no forno (acordádevos de poñelo a pre-aquecer) a 180º e estarán listas en máis ou menos 10 - 15 minutos (depende do forno) cando vexades que están douradas nos bordes estarán feitas.
- Importante: non toquedes as galletas ate polo menos 10 minutos despois de sacalas do forno, xusto cando saen están moi brandas, cando van arrefecendo vanse poñendo máis firmes e xa poderemos pasalas a unha grella para que acaben de arrefecer.